الغرور ألبسك ثوبه للشاعرة النايفة

صحت: كيف الغدر في بحرك بلا رحمه رماني ؟

جيتك بكفي شموس ورحت في عيني ظلام

كنت تقطف من عيونك لي تباريح وأماني

ليه صار الحلم لعبه واصبح الماضي كلام..؟

كان لي قلبك بساط الريح وضلوعك مواني

كيف تنثرني هدية صد في برد الملام

إيه ياللي أمسح طيوفك والاقيك بمكاني

غدرك اللي قصقص جناحي ذبح طير السلام

قلت تنسج لي بنبض الشيح بيت من اغاني

ما عرفت انثى العناكب بين ضلعينك تنام

الغرور ألبسك ثوبه وجيت تطفي شمعداني

وبين حرف وصمت كلمه تنبت اشواك الخصام

من قريت الريح وايامك تقطع قحوياني

كيف يا غصن المحبه تقتل اسراب الحمام

جيت الملم غربتي والشارع الاصفر مشاني

بين ثلج..وبين نار..وبين كلمة:ياحرام

ماحسبت الصبح في لحظات يلوي لي عناني

كف فيها ورد احمر..كف سنت لي سهام

قلت يمكن هالزمن في سهوة ايامي قراني

وبين جمرات الهوى ينبت مع الدمعه هيام

وآثرني بلا قلب امشي يوم خون بي حصاني

بين حب..ودرب كذب..وبين هفوات الغرام