واسطه من الرب اجتج

انها بغداد
المدينه المدورة
أتمنى أن تسدلوا أجفانكم وتتخيلوها بسلام أمنين
بالتمام
الساعة طف
داسن خيول التتر
ضلع الفرات
ضلع اخوج البين جرفينج يبات
وخيم فكرج زينبي
يكود الحمام
الصوت منبر للتحضر للتحرر
تل كليم
بدرب هولاكو الرجيم
تحت فيي قبة عباتج شهرزاد من الشعور
وغار بي صله يسوع
وجرس ضحكه
بلون كورال الكنيسه
بصمت عذراء الصخور
ضل حجاز من الخشوع
بصوت اذان
يكبر بعمر الصغار التروي بيهم كهرمانه
..ميل دكاته سوالف الف ليله شهريار
وهذا اكثر من مكون....
دمعج اخضر
يسكي بخدودج بساتين الثقافة
انتِ عاصمة الترافه وحلف من دور العبادة
فوك اغصان الزلوف
ماتحط طيوف ماعدهه شهادة
ويه الكصيبة التبدي من الأناضول وتنتهي بشط العرب
العين تتوضه بخطوتج من تجين
تعزف الشفه ابتسامه موناليزا
ونفرش الملكه حصير
نركض انصي الشمس حته ليوشل ضواههه
وسره نلزم عالضمير
وننتظر
وتبقه بس وجوهنه ونلكاهه عالشباج راسمهه المطر
من فصيلة عطرج انغذي شرايين الشجر
قسنه خصر السمه لنه بكد ضحكتج
من عباتج
وصله خنفصلهه ليل
يمشط زلوفه بضواج
عالشواطي ايكحلن عيونج نوارس مستحاج
أكبالي من تترهدنين
معلكه زلفينج
تراجي
ولابسه من الضحكه شفه
تحمر خدود السوالف صوتي يطفه
ويالعصافير
التشيل الثوب لا يسحل وراج
الله ميسركي ابد باب الرجاء
اتسلق اجفوفج دعاء
الحد سموات التعرفج
واسطه .....
من الرب اجتج
فاتح الصوتج مضيف


يوسف الدراجي