- قصة مندوب توصيل .

/



صاحب القصة يقول : أنا مندوب في مرسول ومستأجر بيت ، وسيارتي أقساط على البنك ، والفقر واصل حده بس إني متعفف، وعيالي ينتظرون مصروفهم ، وجيبي فاضي مامعي ولاريال..!
وأطلع من البيت وأقول يا الله ترزقني من فضلك ، وأشغل البرنامج ويجيني طلب غداء لمطعم قريب مني في جدة وقلت مرحبا بالرزق ..

كانت الساعة 1 الظهر رحت للمطعم وأنا منحرج أخذ الطلب والمبلغ عالي ومامعي حقه أصلاً ، وتراسلني الزبونة وتقول ليش تأخرت ؟!

قلت والله مامعي فلوس تغطي الطلب وهي معصبة بالحيل وقالت طيب ..

وأنا منتظر بهالحر والإزعاج بالمطعم إلا وترسل تقول يلا جب الطلب ..

قلت يابنت الحلال ماجاني فلوس قالت أنا حولت للشركة كيف ماجاك ؟؟

أنتم كذابين ، أنتم تاكلون حقوق الناس أنتم ماتستحون ، أنا من الظهر أنتظر الطلب والآن أذن العصر وأنت ماجبته ، وأرد بهدوء وأقول لها : يابنت الحلال والله مانزل في حسابي شيء وتراي أنا ودي أقضي مصالحي بعد وأترزق الله ليش بكذب !!

قالت : أنا زوجي جاء الحين وبندبر نفسنا وماسكتني تهزىء والله العظيم لأشتكيك أنت حرامي ، وماتخاف الله وسروق والله لأوربك وأطلع حقي من عينك يالكذاب و و وترى ماهمي الفلوس بس ليش تكذب تقول ماجاتك وأنت بتاخذها !!



أقول لها ياخيتي والله العظيم إنها ماطبت حسابي وأنا بستفيد وطالع أترزق الله ،،

قالت أبد أنت نصاب وحرامي ، قلت سم نصاب نصاب بس الحين وش أسوي أنتظر التحويل وأجيب لك الطلب وإلايوم أجيبه بتقولين مابيه !!

يا أختي ياتكنسلين الطلب وإلا شوفي حل الله يعافيك ..

قالت اقول فارق بس مابي طلب منك ولاشيء ..!؟

قلت لها على كلٍ الفلوس باقي مانزلت في حسابي لكن إذا انزلت أبرسل لك الله لايهينك وبجيب لك الفلوس كاش ، قالت يلا بس فارق يلا ..!

يقول وتكنسل الطلب وأرتاح إن ماعلي شيء أدفعه ، طبعا بالنسبة للبرنامج حصل خلل في السستم بسيط ومانزلت الفلوس إلا الساعة 8 بالليل ..

يقول وأنا بعيد في آخر جدة وأرسل لها السلام عليكم يا أختي أنا المندوب حق التوصيل والمبلغ نزل في حسابي وأبي أجيبه لك كاش عطيني موقع البيت ، وتقول أنا في البرج المطل على البحر والبرج معروف ، وقتها يقول كنت شوي بعيد وبيدي شغلة لازم أقضيها ، وأخلص وأروح وأوصل عندها الساعة 10 ، يقول المصيبة إن كل هالمشاوير بلاش “مشوار المطعم والآن فلوسها ”

وما أقول إلا خلف الله علي الله كريم المهم أرجع حقها وارتاح ..

يقول وصلت على العنوان إلي أعطتني ..

أدق الباب بأدب ما أحد يرد، أرسل ما أحد يرد، وأصبر وأدق ثانية ، وأصبر وأدق ثالثة إلا ترد تقول مين !!

قلت يا أختي أنا مندوب مرسول وجاي أعطيك الفلوس حقك إلاوتقول الله لايحييك !!

الحين مزعجني ومصحيني من نومي عشان 240 ريال !!؟

أنت ماعندك أدب أنت ؟؟

وأقول يابنت الرجال المعذرة منك أنا كنت بعيد عنك وخلصت شغلتي وجيتك والله والآن برجع بيتي وبيتي بعيد ، وتقاطعني تقول بتشكي لي وضعك أنت الحين اخلص وش تبي !!

قلت والله مابي شيء بس خذي فلوسك وريحيني منها بس والله يستر عليك وخلاص ..!

والله من ضيقة الصدر والغثا إلي صابني حطيت الفلوس عند الباب وقلت هذه فلوسك والله يسترك عليك ومشيت ..

وماصدقت افتككككككيت ..والله يعوضني خير

يقول ومن بكرة إلا يجيني اتصال ومن كثر الاتصالات والطلبات ماحفظت رقمها ..

السلام عليكم؟؟ وعليكم السلام

يا أخوي مدري وش أقولك أنا أعتذر منك وأخطيت بحقك وأنت رجال أمين جبت فلوسي لين عند بيتي وضايقتك بكلامي ووالله إن زوجي وبخني على تصرفي وقال تراك ظلمتيه ولازم تعتذرين منه ..

وأنا والله أعتذر منك وأشكرك لأمانتك لأن والله حتى لو ماجبت المبلغ ماكان انتبهت ..

والله إني الليل من ضيقة الصدر ماقدرت أنام لأني هزأتك وظلمتك وآخر شيء أعطيتني حقي ..

وأقول لها : ولايهمك ياخيتي حصل خير ومعليش وأنا أبي بس أقفل يكفي إلي شفته أمس وبالأخير قلت الله ييسر لك تبين أي خدمة ثانية ياخيتي أو شيء

وتقول ايه ، وأنا أنغث لأني قلتها مجاملة وتوهقت..

قالت أنا قالي زوجي كلمي الرجال واستسمحي منه بأدب وعطيه تعبه وأنا أبيك تجيني لنفس البرج إلي جيته أمس .!!

يقول وأنا خفت واستغفر الله وسوست واستشكيت إنها بتضرني ، لكن من كثر الإلحاح بأدب ( لو سمحت وتكفى وعند الباب و و ) يقول تطمنت بس مهما كانت الحالة الوضع كان جدًا مرررريب !!

قلت أجل اسمعي أنا بجي بس مابطلع أنا أبي أخلي ولدي إلي عمره 11 سنة هو يطلع لكم عند الباب ، قالت خلاص خله يجي ..

يقول وأوصل وأطلع معه بالاصنصير وقلبي شاكني وخايف وأوقف ، وأقوله هذه هي الشقة دق عليها ، ولو سألوك وين أبوك قل : تحت ..

وأوقف أراقب وماأدري وش وراهم ..

وراح الوليد وطق الباب .. وترد أنت أبوك فلان ؟؟ قال ايه أنا ولده ..

وتعطيه ظرف وتقول عطه أبوك واعتذر لي منه ..

وإلا الولد مقبل علي ومعه ظرف وهنا عرفت انها فعلاً مكأفاة،

وأفتح الظرف وأنا والله إني طفران وجيبي فاضي ..

إلا ومبلغ ألف ريال ، والله العظيم كأنها 10 مليون، فك لي هالمبلغ أزمات مو طبيعية، أعبي بنزين وأشتري مقاضي للبيت وأعطي زوجتي 200 وأفرق للعيال على خمسة شيء شيء مو طبيعي كأني ولد الراجحي اليوم ويا الله من فضلك ..

وأرسل للحرمة الله يوفقك ويجزاك خير وتراي يوم المطعم ماكذبت عليك أقسم بالله ماكان بجيبي ولا ريال ولين قبل تعطيني ماكان فيه شيء لكن الله يوسع لك زي ماوسعتي لي ويخلف عليك ..

قالت هذا حقك وتستاهله لكن طلبتك حللني وبيحني على إلي صار ، قلت أبد الله يحللك ويبيحك ويجزاك خير ..

قبل تقفل قالت لي حاجة لو في طلب نبيه أو شيء نبي نطلبه بنطلبه منك أنت قلت ابشري أنا بالخدمة ..

يوم يومين ماتتصل ولاشيء إلا قلت للعيال يلا نطلع بنروح الحديقة تلعبون وتنبسطون ، وأطلع إلا المفاجأة بوجهي ..

السيارة مو موجودة !!

وهذه مو أول مرة تحصل لي هذه ثالث مرة تصير معي ، لأن تراكم ثلاث أقساط وموقع عليها عقد إنه لو ماتسدد تنسحب عليك لأن السيارة للبنك ومعطيني تفويض للقيادة إلى أن يكتمل المبلغ ، مااكتمل تنسحب السيارة بالنظام ،

الأوله والثانية يمشونها الثالثة لو تطلع عينك مايرجعونها حتى لو سددت ، وأشيل هم الحين كيف الطلبات كانت تساعدني شوي والحين شلون وش بسوي !!

المهم وأقول للبزران ارجعوا ماعاد فيه حديقة ..

وأروح أنسدح بغرفتي وأقول لزوجتي لايزعجوني البزران قالت بتنام قلت لا برتاح شوي والأخلاق قافلة والتفكير ذبحني ، إلا ويجي اشعار رسالة من الحرمة نبي منك طلب و و ..

قلت والله يا خيتي ما أقدر اطلبي أحد غيري قالت شفيه عسى ماشر ، وأعلمها إني لقيت البنك سحبوا سيارتي قالت كم عليها قلت 3 أقساط ، قالت أي بنك قلت البنك الفلاني ، قالت بسسس عندي أحد قريبي بالبنك مسؤول هناك بكلمه ويطلع لك سيارتك يوم يومين بالكثير بس عطني الله لايهينك رقم العقد .. قلت أبشري

شوي إلا يجيني تم سداد ثلاثة أقساط سبعة آلاف ريال .!!!!

إلا ترسل تقول يافلان رح خذ سيارتك قلت جاني سداد طيب قالت آي الحمدلله تيسرت ادع لفاعل الخير ..

وأنا انصدم وأتحرج يابنت الحلال والله إني مستحي قالت قل لا إله إلا الله ورح استلم سيارتك ..وأروح البنك ويقولون لا ماتستلمها ثلاث مرات ماتسدد والدنيا ماهي لعبة و و و ..!

آخر شيء قالوا شف تدفع الآن 1500 زيادة ضمان للقسط الجاي ونعطيك سيارتك واستحييت أكلمها وأروح لجماعتي وربي أخذ من ذا مية على ميتين والحمدلله تجمعت ياربي لك الحمد وأروح أطلعها ..

يقول وصارت كل طلب تناديني عشان تعطيني رزقتي وماقصرت معي الله يسعدها بنت الأجواد ، وأنا والله ما أعرف وين أودي وجهي منها و ما في استطاعتي لا أسدد ولا أعطيها ولا شيء و الله يجزاها خير أكرمتني وما قصرت، قلت لها ياخيتي ملكتيني بالمعروف ولا لي عليك سبيل

وأنا ما ألحق جزاك لكن والله مالي إلا الدعاء والله يبارك لك ويوسع عليك دنيا وآخره زي ماوسعتي علي أنا وعيالي بالخير والبركة قالت آمين وجزاك الله خير ..

لكن اسمع أنا في يوم من الأيام كنت ماأملك المال وتمر علي أيام عجاف كثير حتى الريال ما ألقاه ، وأصادف حرمة عجوز وتقول يابنتي بعطيك نصيحة وخليها قاعدة بحياتك ،

كل ماشفتي محتاج ساعديه وفكي عنه قد ماتقدرين ، وفعلاً مرت أيام يكون مامعي وأعطي إلي حولي من نفس مصروفي وأحيان أعطيهم وأنا محتاجة بس لوجه الله أقول يمكن هم أحوج ويشاء الله تنفتح بوجهي كل الأبواب المغلقة ، ويتزوجني هالزوج ذوي الجاه والثروه ويكرمني ويارب لك الحمد وأنا الآن أنصحك نفس النصيحة ..

يقول والله كنت أطبق كلامها وفعلاً كنت أحتاج بس ماأوصل لمرحلة الحاجة القوية زي قبل ..وكل هذا بفضل الله ثم الصدقة ..

العبر المستفادة من قصتنا :

•الإحسان يُجزى إحساناً

•الصبر مفتاح الفرج

•الصدقة تجلب البركة

•المعاملة الطيبة تغير القلوب

•احترام كرامة الآخرين واجب

•العفو عند المقدرة شيمة الكرام

•مساعدة المحتاجين عبادة

سلمت اناملك
على ماجادت به من روعة بالطرح
دام لنا ابداعك بأرقى حالاته
بأنتظار عطائك القادم

طرح في غايه آلروعه وآلجمال
سلمت آناملك على الانتقاء الاكثر من رائع
ولاحرمنا جديدك القادم والشيق
ونحن له بالإنتظار,,~

سلمت الأيادي
لهذا الجهد الطيب
دوم الأبداع
وماننحرم من فيض عطائك
لسموك جنائن الياسمين
مع كل الود

دمت لتالق عنوان
تسلم الانامل
على هـذا الابداع والتألق
مودتي وباقات الورد

يعطيك
عافيه
لروعه طرح ود وتقدير