فاشل كبير بقلمي الشاعر محمد البهلوان

من بعد عمر راح زمان بيقولوا انت فين
قولتلهم نفس المكان ما روحتش بعيد كتير
زي ما انا في كل حاجة طبعي فرحي حزني غير
شوية شابت اه ملامحي وكبرت اه كتير

الدموع ساكنة في عيوني عصفور مش عارف يطير
كله خاني وكله سبني كله راح كله خير
اه يا قلبي سبب عذابي وسط ناس مالهاش ضمير
واللي شافني يقوللي انت مش ممكن مستحيل

معقولة مدوقش فرحة في العمر اللي راح و ضاع
والدمعة في جوه مني نفسها تقول الوداع
للي باعني واللي سبني غشاش مليان خداع
اكمني يعني قلبي طيب يبقي انا فاشل كبير


والكبير ده حزن قلبي حزن فاق كل الحدود
لو فيوم هربت منه يلاحقني ليه بالورود
هو انا كان اصلي حزن ولا انا اللي محسود
كل حياتي في جراح وفحزني بقيت الأمير

بقلمي الشاعر محمد البهلوان
يحظر نقل او نسخ العمل دون الاشارة للمصدر وصاحب الكلمات