لا يطول غيابك

لا يطوِّل غيابك ثم آخذ عليه
لو تخلَّيت عنَّي عنك قلبي تخلَّى

العذر والتعلِّل والحكي ما نبيه
من تحرَّك فؤاده بالهوى ما تغلَّى

طبعي الصبر لكن وش عليه أرتجيه
من طويل الصَّبر يعقوب وأيوب ملَّى

دامني حي عطني وش بقى نحتريه
ما أبي دموعك الَّلي عقب موتي تهلَّى

ما بقى بالعُمُر مقدار ما راح فيه
كلِّ ما زلِّ يومٍ يوم بالعُمر ولَّى

ما يعرف الجمر مثل الذي يكتويه
أحد يدفى بناره واحد فيه يتصلَّى

يا من القلب حطَّيته براحة ايديه
ما رِضى له مكانٍ غير كفَّك محلاَ

كم تعذَّر وعيَّا عن هوى مهتويه
لين طاح بيمينك بالغرام وتجلَّى