غِنْوَةْ حُبّ

شَوْفِتِكْ تِحْيِيْ الْعِرُوْق التَّالْفِهْ

فِيْ جِفَافْ الْعِمْر كَنِّكْ صِبْح عِيْد

جِيْتِنِيْ .. وِظْرُوْفنا مِتْخَالْفِهْ

وِابْتِدَتْ لَحْظَاتْ مِنْ عِمْرٍ سَعِيْد

مَعْك رُوْحِيْ بِالْغَلا مِتْوَالْفِهْ

وْ لِكْ تِفِزّ بْشَوْق نَبْضَاتْ الْوِرِيْد



وْكِلّ مَا مَرَّتْ عَلَيْنَا سَالْفِهْ

نِضْحَكْ وْنَذْكِرْ تِفَاصِيْل وْنِعِيْد

كَنْ قِوَافِيْ الشِّعر قَبْلِكْ حَالْفِهْ

مَا تِغَنِّيْ حِبّ بَابْيَاتْ الْقِصِيْد

وْ كِلّ لَحْظَاتْ السِّنِيْن السَّالْفِهْ



مَاتَتْ .. وْعَاشَتْ مَعِكْ عِمْرٍ جِدِيْد

يِسْتِقِرّ الْقَلْب بِاللَّى يَالْفِهْ

وْ فِيْ وِصَالِكْ نَالْ قَلْبِيْ مَا يِرِيْد

وِالْمَحَبّهْ لَوْ تَرَاهَا كَالْفِهْ

بِالْوِفَا تِبْقَى لِكْ الْعِمْر الْمِدِيْد

وْشَوْفِتِكْ أحْيَتْ عِرُوْقِيْ التَّالْفِهْ

وْ صِبْح وَصْلِكْ كَنِّهْ إلاَّ صِبْح عِيْد