الصالح ناصر الدين محمد

السلطان الملك الصالح ناصر الدين محمد ابو السعادات ابن الملك الظاهر ططر ( اتوفى فى القاهره، 1429 ). تاسع سلاطين الدوله المملوكيه البرجيه (الشركسيه). ابن السلطان الظاهر ططر. قعد على عرش مصر سنة 1421 بوصيه من ابوه و هو عنده حداشر سنه لغاية ما اتعزل سنة 1422 بعد ما قعد على العرش تلت تشهر وأيام.
قبل الظاهر ططر مايتوفى كان وصى بإن ابنه " محمد " يخلفه فلما اتوفى سلطن الامرا " محمد " بلقب الملك الصالح " فى 30 نوفمبر 1421. الامير برسباى اتعين " نظام الملك " و دى وظيفه جايز كان معناها " نايب السلطنه " و بقى مدبر المملكه و الحاكم الحقيقى ، و استمر الوضع على كده لغاية ما برسباى عزل الملك الصالح.
بيحكى ابن إياس إن " تانى بك ميق " اللى عينه الظاهر ططر نايب فى الشام راح لبرسباى و كلمه فى موضوع عزل الملك الصالح و ان برسباى يتسلطن مكانه فعجب الموضوع برسباى و وافق الامرا فإستدعى الخليفه العباسى فى القاهره و القضاه و خلعوا الصالح محمد من السلطنه و اتنصب برسباى مكانه. برسباى مانفاش الصالح على اسكندريه زى ما كانت العاده لكن بعته يعيش فى دور الحريم فى قلعة الجبل فعاش هناك لغاية ما عيى بالطاعون و اتوفى سنة 1429.
قعد الصالح ناصر الدين محمد كسلطان بالاسم بس تلت تشهر و ايام فى سنة 833هـ/1422-1421م و اعتبرت السنه دى سنة السلاطين لإن قعد فيها على عرش مصر اربع سلاطين و ده خلى عامة المصريين يسخروا و يرددوا : اربع سلاطين فى سنه .. و ايش دا العينه.