قصة الممتحنة من أروع القصص الإسلامية

أم كلثوم دي كانت بنت عقبة بن أبي معيط اللي لقب (بأشقى القوم) هو دا اللي جاب سلا الجزور (سلا الجزور يعني بعد ذبح الشاة أمعاء الشاة والقاذورات اللي في بطن الشاة) وحطها علي ضهر النبي (صلى الله عليه وسلم) وهو ساجد، وهو نفس الشخص اللي لف ردائه وخنق بيه النبي (صلى الله عليه وسلم) وهو بيصلي لحد ما الأكسجين قلّ في رأسه واغمى على النبي عليه الصلاة والسلام وكمان بصق في وجهه.. بأبي هو وأمي صلى الله عليه وسلم⁦⁩

وبالرغم من كل ضلال عقبة بن أبي معيط ربنا يجعل من صلبه من يوحد الله
أم كلثوم دي كانت مثقفة جدا وكانت طالبة علم وكانت بتقرأ كتير..

المهم يدخل الإيمان في قلب أم كلثوم ولكن تكتم إيمانها عن أبوها عقبة بن أبي معيط وعن اخواته عمارة والوليد

ويجي موعد الهجرة ويهاجر النبي عليه الصلاة والسلام وأم كلثوم عايزة تهاجر مع النبي ولكنها تخاف من بطش أبوها واخواتها... وتصبر أم كلثوم ... وتيجي غزوة بدر ويُقتل أبوها عقبة بن أبي معيط ويموت على الكفر

وتكبر أم كلثوم ويبقى عندها 16او 17 سنة ويجي سن الزواج ويتقدم لخطبتها أشراف شبان مكة وترفض أم كلثوم وتصبر أم كلثوم وحلمها أنها تقدر تهاجر للنبي في المدينة
بس يحصل حدث يغير حياة أم كلثوم يجي صلح الحديبية ويكون من شروط صلح الحديبية أن لو حد راح للنبي المدينة عشان يسلم، فالنبي عليه الصلاة والسلام لازم يرد الشخص ده ويرجعه تاني مكة

وتسمع أم كلثوم بشروط صلح الحديبيه يعني مينفعش خلاص تهاجر للنبي المدينه ولو هاجرت النبي لازم يرجعها مكة تاني عشان شروط الصلح
ويشتد الخناق علة أم كلثوم وتقرر إنها تهاجر حتى لو النبي رجعها مكة

انتوا متخيلين الموقف؟
بنت عندها 16 سنه تهاجر لوحدها المدينة المنورة في الليل والطرقات اللي بين مكه والمدينه الوعرة وكمان المسافة الطويلة؟
ومش بس كدة ده ممكن النبي يرجعها مكة تاني وساعتها هيتعرف إنها مسلمة وتتإذي من إخواتها !!
إيه الثبات دا يا جماعه!

وتهاجر أم كلثوم وتوصل المدينة المنورة وتروح للنبي (صلى الله عليه وسلم) والنبي محتار يعمل ايه معاها والصحابة يقولوا: أزاي نرجعها مكة يا رسول الله؟
والنبي عليه الصلاة والسلام ساكت عشان لسه منزلش الوحي (وما ينطق عن الهوى* إن هو إلا وحي يوحى)
وينزل جبريل بالوحي من فوق سبع سماوات في أمر أم كلثوم وتنزل آيات سورة الممتحنة
( يا أيها الذين أمنوا اذا جاءكم المؤمنات مهاجرات فامتحنوهن، الله أعلم بإيمانهن، فإن علمتموهن مؤمنات فلا ترجعوهن إلى الكفار).