گالو ما تجي وگالو عليك بعيد

گالو ما تجي وگالو عليك بعيد
〰️
ودرب كلش طويل البينك وبيني
〰️
شح مني الدمع گد ما بچيت أعليك
〰️
وأعاتب بالگمر هلبت يواسيني
〰️
ظلم كلش ظلم تحيا وتموت بشوگ
〰️
وجا شنهو العمر من تذبل رياحيني
〰️
تعب حتى الورق حبر ودمع مخبوط
〰️
وحسره وي القلم تأذيني وتبجيني
〰️
صفة رسمك حلم عذب حنايا الروح
〰️
مثل طيفك أبد ما شايف بعيني
〰️
نهر طولك عذب صافي ويرد الروح
〰️
وأنه الميت عطش وبكطره ترويني
〰️
أكتبلك شعر وأسطرلك الأبيات
〰️
وانته بلا بخت بالفركة تجويني
〰️
قيس بعام واحد وتيبّس من الشوك
〰️
وآنه سنين مرّت ما غفت عيني
〰️
كلي شلون رايك والعمر محسوب
〰️
وجلمات الشماته تكول ناسيني
〰️
طلابه وي العشك وأيامي كلهن ليل
〰️
وشمس حبك ظلم من ما تضوّيني
〰️
كافي من العتب راح أختم الأبيات
〰️
وأحجيلك سطر بي كل عناويني
〰️
مثلك ما شفت ولا رايد ولا ريد
〰️
وأحبك موت عنوان لدواويني