يا معذبني معك من عذابي وش تبي

يا هموم الزمن في صدري اكلي واشربي
لين يروى منه كل هم ويشبع كل ناب

عقب ما تعبت رجلي وغبرت اشنبي
ما بقى غير الدسم واختلط به سم داب

لو تلافيت الطمع واكتفيت بمكسبي
ما صدمني موت حلمي بريعان الشباب

ودي اشري راحتي واستريح من اتعبي
بس ماخذ مقلبن في خطاي انه صواب

كم لي اسأل باكر و في سؤالي مطلبي
انت ريحن صرصرن عاتيه و الا سحاب

لا لبس ليلي نهاري مثل سود العبي
اختنقت بشين اكبر من اعراض اكتئاب

الجفا عكر مزاجي وكدر مشربي
والرجا ظاهره رحمه وباطنه العذاب

يا معذبني معك من عذابي وش تبي
والله ان الصبر ما عاد في خرجه زهاب

ليه يا قلبي بعد مت انا وانت اسببي
تعتبر قتلي حلالن وفيه اجر وثواب

ابشر ان الشيب يكسي دقني وشنبي
كان قصدك تختبر كيف تأثير الغياب

كن وقتي في غيابك عمر نوح النبي
وانتظاري عند بابك إلى يوم الحساب

غبت ما خليت لي غير ناري وحطبي
بس ليت الحنين لك مثل ما غبت غاب

ذنبي انه واصلن فيك وصل امي وابي
قلبي اللي ما بعد تاب من حبك واناب

انت بس اطلب وعطني من العفو اطلبي
واغفر الزله بجاه الغلا قدر وجناب

ايه احبك لو سبا راحتي حبك سبي
ولو ضلالي في غرامك ضلال اهل الكتاب

ايه احبك وانت في كل عشقن مذهبي
وانت رغبة خاطرن ما سمح منها وطاب

مبدأ راسخ ويؤمن به الحر الأبي
ما يساوم فيه ابد لو على قطع الرقاب