يا هجوس الشاعر اللي كلما حرك شجونه

يا هجوس الشاعر اللي كلما حرّك شجونه
درهمت خيله بمظمار المشاعر مسرجاتي

ما يثير حْساسه الهادي ويستنهض فنونه
الا هيض او غيض من نبع الشعور الكامناتي

وانا لا مني صخرت القاف واغرتني لحونه
اعتنيبه واهتنيبه والمعاني سامياتي

وان نخيتك ياقصيدي ما لي وما لك مهونه
رغم شحّ العاطفه مرساك من ذاتي لذاتي

قد عزمت اشوم عن شعر الغزل واخلف ضعونه
وْردّني له حاجتينٍ بعثرت سر امنياتي

حاجتينٍ من حلاها الرجل ما تشبع عيونه
الزهور النرجسيه والبنات المترفاتي

ينعشه زهر الربيع اللي تغيا في غصونه
ويطربه زين البنات المذهلات الفاتناتي

من روائع حسنهن حتى العمى يلعب بشونه
لا سمع عطر الكلام العذب من همس الشفاتي

ينجرح ويذوب قلبه والبشر ما يرحمونه
وتعشق اذنه قبل عينه لا استمع للغانياتي

كيف باللي لا نظرهن ما تجنن به جنونه
وينقهر ويموت غبن مْن العيون الساحراتي

لا اجتمع زين الملامح والنعومه والليونه
لانت صْخور القلوب اللي من اول قاسياتي

معْ جمال الشكل تجتمع الرشاقه والمرونه
وخفة الدم والملاحه والصفات النادراتي

هذا هوْ اللي جرح قلبي وجدد به طعونه
وعاد نشوة ذكرياتي فالسنين الماضياتي