استرح يا فاير الدم لا تولع حريق..

.



استرح يا فاير الدم لا تولع حريق
وان خسرت المعركة تستفيد ادروسها

ما خلق في الكون معصوم لا يمكن يضيق
و اكثر العالم لا ضاقت تشين انفوسها

اصبر اليا جات لو كان من خوك الشقيق
الرجل يعز ربعه ما يكسر قوسها

لا تطيع ابليس و تطير في وجه الرفيق
وان ضربت الروس بكرة تروح اتبوسها

ولا تشره وانت مالك على الشرهة طريق
كيف تجني ثمرة ما سقيت اغرسهـا

وكل وادي له رحابة و محناب و ضيق
خل مشيك بالقرارة و كب اطعوسها

ولا تنزل لك فريق و ترفع لك فريق
مانت ميزان العدالة ولا فانوسها

و أحفظ السانك عن الهرجة اللي ما تليق
يذبح الرجال كلمة ضغط نادوسها

و التواضع و السماحة مع الوجه الطليق
تكسبك حب الخلائق وكانك اتروسها

وان طلبت الحق لا تكون بحقوقك دقيق
بكرة يحدك على القوم شر انجوسها

ولا تقول الدين ماهو في الوجه الحليق
كم دقون تخفي الشر تحت البوسها

و الوجيه اللي تحطك مثل هضبة طويق
لا تسمع في حكاها و دق اجروسها

لا زعلت بكرة بتحذف عليك المنجنيق
و العلاقة بينك و بينها بتدوسها

و اعبد الله و اشكره و الزم الحبل الوثيق
و اترك اصحاب المصالح تعبد افلوسها

و الحذر لا احد على سرك الخافي يويق
هم تحطك ساير الناس تحت اضروسها

ولا تجادل جاهل عادته نشاف ريق
ولا تنزل عاقل الناس مع دنفوسها