يا بــــرد ..ما عاد باقي من جروحي خفايا

يا بــــرد .. لا تبحـــث خفايــــا التناهيت
ما عاد باقي من جروحي خفايا

ايه ارتعش من لفحتك لا تماديت
حاسب عليك الله وش ذا السوايا

ليتك قبل تقبل على الجوف سميت
تستوجع جروح السنين الظمايا

تصحى معي الاشواق وتبات وابيت
لها مع المسرى علوم وخبايا

بدفى لو البس لي من البرد جاكيت
لكن وش يدفي الجروح العرايا

مرت علي وجيه عالم ولا ريت
مثله حلا خلقه وطبع وسجايا

للورد في خده عروق ومنابيت
وللموت في عينه احجاب ومنايا

في ذمتي مانسى غلا من تفديت
الين تنسى البدو حب المطايا

اللي غرامه ينعش الروح لا ابطيت
اقلها شي ٍ يـشــد النوايا

معي معي من وين ماصد واقضيت
كن الاماكن من طيوفه مرايا

روحت بافكاري بعيد وتعنيت
رديت خاسر من جيوشي سرايا

يابرد خاف الله ويش انت سويت
نبشت ذكرى قد لها في الحنايا