بطلنا_الحب
بطلنا غرام وهيام وسهر بالليل
بطلنا نصوغ الشعر ..
في صورة ست بشكل جميل
بطلنا عتاب ..
بطلنا نبرر أفعالنا .. ونعمل مووايل
بطلنا نخلي القلب يدق
ويشق طريقه في قلب الويل
ونعافر مع ناس مش سهله
وتخلي الجسم هزيل وعليل
بطلنا نعلم أوجعنا تلوي دراعنا
بطلنا نخلى قلوبنا تميل
ماهو أخر كل حكايه حب
بتلاقي الواحد شاب مش شب
ويعاني الخزي ويبقي ذليل
علي عقرب ساعتي راح أظبط
قلبي يدق يدوب ويعيش
يستغفر عن ذنبه في حبك
وأتحول صوفي اهيم بالكون
والف الكون ويا الدروايش
وأعملك حضرة وزار للصرف
وأغض الطرف
وأعيش فى الترف مع الذكرى
والفكرة راح ألمع نفسي
وأجدد من جدران عمرى .. وأديها ورنيش
ما انا لازم اعيش ..
علي ضوء الشمعة اللي بتبكي
علي حالي وحال الناس أجمع
وتشوفني بقربها تدارى
في طبق ملامين مليان بالدمع
مليان بحكاوى كتير عشاق
إتقابلوا وفارقوا وماتوا وجع
وهصاحب ولاعة عمرى
وسجايري اللي بتحفظ سري
وراح أمسح م الماضي رسايلي
واحذف أيام الويل والقمع
بطلنا الحب ..
وأحاول أعود تاني لروحي
وبنفسي أعالج كل مافات
وأداوي نزيفي وجروحي
وأخرج نفسي من الحكايات
ولاعاوز حد يكون جنبي
ولا نابني غير البور م الزرع
تخاريف من نومي ملازماني
وألوان ريشتي ماليها ملامح
علي لوحة عمري المرسومه
جرثومة قديمه لناس فاتت
راحت وسابتنا في شدتنا
خلت جوانا حاجات ماتت
وحدود الشوف فوق اللوحه
بتخلي الفكر كمان سارح
بطلنا نحب
علشان أنا بكرة مبتغيرش
واهو بكرة بقي شبه امبارح
أنا واحد لملم طموحاته
وفى وسطيهم وحدي بكافح
عامل قاعدة ودقيقه حداد
علي ناس بتحاول تحبطني
وتفتتني .. وتشتت عزمي اللي بنيته
وتخلى السكر بقا مالح
أنا عامل ليا عصير م الفرح
بيرقص روحي من الأحزان
برشامة و بتنسيني الجرح
بتعليني رغم الحرمان
رغم أنا تعبان .. لكن بضحك
والناس تحسدني علي سعادتي
واهي دى ارادتي .. مبحبش امشيها مصالح
ولو اقدر اعمل كارتين حب
علشان تتوزع ع المحزون
والله راح اعملها دليفري
وإتناسي لكل اللي ظلمني
وبرضه أسامح
______________
بقلم #تامرالنقيب
خربشات _نقيبيه
5/2/2024