امثال دارجة باللهجة العراقية...

امثال دارجة باللهجة العراقية...



" اخذ الشور من راس الثور " ؟؟
وقصة هذا المثل هى :
ذكر قصص التراث الشعبي أن امرأة قروية كان لديها ثور تستعين به في أعمال الحرث ، وفي أحد الأيام وبينما كان زوج هذه المرأة خارج البيت، اشتد العطش على الثور ، فأدخل الثور رأسه في جرة موجودة في ساحة البيت ، ولم يستطع الثور إخراج رأسه من هذه الجرة ، ولم تعرف المرأة كيف تتصرف ، لأنها كانت تريد المحافظة على الثور ، وكذلك المحافظة على الجرة خوفاً عليها من الكسر .
استعانت المرأة بجارها أبو العريف ، وحكت له القصة ، فجاء ودخن علبة الهيشي ، وشرب إبريق قهوة ، وهو يفكر كيف يخرج رأس الثور ولا يكسر الجرة ، وبعد جهد جهيد وتفكير طويل ، قال للمرأة إنه ليس هناك بد من قطع رأس الثور ، لكي نستطيع إخراج رأسه من الجرة من دون أن تنكسر . فناولته السكين ، وقطع رأس الثور ، ولكنه مع ذلك لم يستطع إخراج رأس الثور الكبير من الجرة ، فقال للمرأة إنه لا بد من كسر الجرة لإخراج رأس الثور المقطوع ، وبالفعل ناولته الفأس وكسر أبو العريف الجرة وحمل بيده رأس الثور مسرورا بذكائه .
عندما عاد الزوج إلى البيت وسأل زوجته عما حصل ، أخبرته بما جرى ، فضرب كفا بكف وقال : " خذ الشور من رأس الثور " .
وصار قوله بعد ذلك مثلاً لكل أحمق يقدم تضحيات كثيرة ، ثم لا يحصل على أي نتيجة
بل يخسر ما لديه .

(جفيان شَر مُلَّه عليوي)
قصة مثل شعبي عراقي (جفيان شَر مُلَّه عليوي) في احدى القرى العراقية جان اكو جامع وكل الناس تصلي بيه.. ماعدا واحد جان مايصلي بالجامع.. وأمام الجامع اسمه (عليوي) ..جان يضوج منه لان مايصلي بالجامع ..وكلما يضرب مثل على شخص سئ يكول لاتصيرون مثل فلان الي مايصلي بالجامع . فمرة راد ذاك الشخص يخطب فكالوله لازم الامام يكتب عقد زواجك وهو يضوج منك لان ماتصلي بالجامع فروح صلي حتى يكتب عقد زواجك . فذاك الشخص ماظل عنده غير حل ..فراح للجامع ليصلي صلاة الفجر.. فوكف داخل الجامع وكال :"نويت ان اصلي صلاة الفجر جفيان شر ملا عليوي" فمن ذاك الوكت صار المثل شائع وهو "جفيان شر ملا عليوي"

(لاحظت برجيلها ..ولاخذت سيد علي)
هذا المثل يضرب للشخص اللي يعوف اللي بيده واللي يطمع بالحصول على مل هو افضل منه وبالتالي ما يحصل لا على اللي جان يطمع بيه ولا حافظ على اللي بيده ويخسر هذا وذاك ويضوك وبال امره وعاقبة طمعه.....

القصه تكووووول

جانت اكو مريه كلش كلش حلوه فاتنه بالجمال وطاهره وعفيفه هاي المريه زوجوها لرجل فقير كلش ورزقه هم كلش قليل بس هذا الرجال الفقير جان يموووت عليها ودائما جان يحرص ويحاول يخليها مرتاحه وتعيش سعيده باللي تسمح بيه حالته يعني على كد حاله المهم مرت سنين على زواجهم هاي المريه الشيطان كام يوسوس براسها ملت عيشة الفقر ويه زوجها ونفرت من العيشه وياه راحت تدور على فتاح فال يشوفلها حظها وين يكعد وحظ رجلها يعني بين قوسين (يكشفلها) طبعا هاي حسب عقليتها ويشوفلها شنو مستقبل حياتها ويه زوجها المهم دلتها النسوان على واحد اسمه الملا سيد علي هذا جان مشهور بقراءة الفال هيه هم ما صدكت راحت لسيد علي ...هذا سيد علي شاف شكلها يخبل وحليوه زاغت عينه عليها قرر يستحوذ عليها لنفسه المهم جذب عليها شويه حسبلها النجوم وساللها ملك الجن بعدين كللها تره النجم مالتج ومال زوجج ما يتوالمون والطلاق من زوجها هو خير ما تكدر تسويه ولو الطلاق هو ابغض الحلال عند الله... بس هو بحجيه لمحلها هو مستعد يتزوجها ويسعدها وره ما تطلك من رجلها وتكمل عدتها هاي هم الغبره حشاكم صدكت بيه وثقت بكلامه رجعت لزوجها وطلبت منه الطلاق غصبا ما على خشمه هو هم كام وطلكها وكامت رجعت لسيد علي حتى يوفي بوعده وياها ويتزوجها هذا سيد علي كام يماطل بالموضوع واليوم والباجر واصبري بعد لحد ما حست بمكره والخدعه مالته وعرفت هو ابد ما راح يتزوجها رجعت لزوجها القديم تبجي وتتعذر وتتاسف وطلبت منه يعيدها لعصمته مره ثانيه هذا الرجال بالرغم من فقره بس جان عنده اباء وعزة نفس وشيم مقبل يرجعها تاليها رجعت لاامها تدك وتطلم وتبجي وعاشت ويه امها وقاسمتها قسوة الفقر واهوال الفاقه ..الناس سمعوا بهاي السالفه وكالوووو ياااااا هاي لا حظت برجيلها ....ولا خذت سيد علي...ولا موها على سوء تصرفها وعدم قناعتها بما قسمه الها رب العالمين من الرزق ...وهسه صارت هاي السالفه مثل..

ان چان هذي مثل ذيچ خوش مرگه وخوش ديچ
ذهبت امرأة (هجرها زوجها) الى احد المشعوذين من السحرة ليرده اليها وبعد تسلمه اجوره، طلب منها تهيئة ديك مطبوخ وقدر مرق ورز مقلي بالدهن الحر على ان يكون الرز معه اللوز والجوز ليقدمه حسب زعمه( عشاء للجن) فنفذت المراة المطلوب منها ولما قدمته الى الساحر طلب منها الابتعاد حتى لايصيبها الاذى من الجن.. ثم جلس الساحر في مكان اظلم واخذ يلتهم الطعام
من الصدف ان الزوج تصالح مع زوجته، بعد فترة قصيرة ايقنت الزوجة بقدرة الساحر وانه هو السبب برجوع زوجها اليها!! ومن الصدف ان صديقة لها هجرها زوجها فقصت اليها حكايتها واصرت عليها بالذهاب الى هذا الساحر...ولما قصدته طلب منها اعداد الطبخة المعهودة (طبخة الديج) وقبل ازاحة الغطاء عن المائده قال:: مخاطبا نفسه
(ان كانت هاذي مثل ذيج خوش مركه او خوش ديج) اي ان كانت هذه المراة مثل صديقتها في الغفلة والبلاهة فما الذ الطعام والمرق والديك.. فصار مثلا......