لا تخلوني بگبر.. ماريد انا موتي

(صوت من القبر )

شاكر السماوي

لا...
جنّازه لا...

لا بالكَبر تطفون شمعات العمر
خلّوا النعش حدر الشمس..للطير للريح التمر

بلچن يسح ثلج الدمه...
ويعود ب ارمادي الجمر
بلچن بله يدوس العظم... ويدور لظيمه صبر

بلچن هَوه ايصحي الضلع..واتعود موجات الصدر
وايعود گلبي ممتحن مابين مده والجزر
واشهگ واشگ ليل الچفن
واطوف روحي وي الفجر
واصرخ ابكل حيل الوتر....

واسمع صدى صوتي:
لا لا تخلوني ابكَبر....
ماريد أنا....ماريد أنا..ماريد أنا موتي ........

ابدا فلا واحد سمع.... اولا واحد الگلبه التاع
چني ولا منهم جنت،،
همو على دفني بساع

لا حسوا بنعشي اليون .. لا حسوا ابضحچ الگاع

كلمن نفض ايده ومشه ، مستعجل بغير وداع

ياعيد ميلاد الگبر،،ريتك فلا جيت بساع
طفين بعيوني السمة ،
وطشيت فوگاها الگاع

ملاح جابه مركبك.. ملفوف بشراع الموت
ذبه على جرف الزمن
متخورس بحلگ الصوت

لاچن تمني بشفته..
لاذَل ولاهرشه التوى
روحي على هام النخل ..لوچنت بترابك نوى

محتامه ريتي اعله الهوه
وعيوني مشتهيه الضوه
والطيف بگليبي دوه
يشهگ گبل صوتي

لا لا تخلوني بگبر.. ماريد انا موتي...