السنين اللي قفتنا قالت لصدري عليت

السنين اللي قفتنا ، قالت لصدري عليت
مالقينا في غصون العرعره ظل وذرا

يامواسي قلب هايم ، دوك جرحن به ضريت
لا تقول ان القصايد ، كلها كذب وطرى

فاض كاس الحبر غيض و قمت مع قافي سريت
مكتفي شفي و عايف لا تلحّقني زرا

النشيط اللي تخبره كان باقي ما نسيت
ما بقا حيلن بعزمه والجسم منك انبرى

شاعرك كلّت عزومه كانك بعزمه هقيت
شام عن دربك وقفا ما على عشقك طرا

جيت ابسّلمك عهدت خدمتي بعد انتهيت
جاك معروضي و تكفا سنعه بلّي ترا

مشرط الجرّاح بيدك و المرض فيه ابتليت
ان سمحت استأصله مع كل شريان(ن) جرا

لا تهمّلني وتنسى نبض قلبن به عديت
اكفني عشقك بعيد و كل من يكتب قرا

انت مثل الطرق الاعوج لانشب في صدر بيت
كل ما سندت بك قدام يرجع بي ورا