شخصيات برلمانيين مصريين_ احمد رشدى

اللوا احمد رشدى (29 اكتوبر 1924 - 4 يوليه 2013) ، كان وزير داخلية مصر فى الفترة من 17 يوليه 1984 لغاية 27 فبراير 1986 .

نشأته

اتولد اللوا احمد رشدى يوم 29 اكتوبر 1924 فى مركز بركه السبع بمحافظة المنوفيه فى مصر ، اتخرج من كلية الشرطة سنة 1946 . اشتغل فى المباحث وبعد كده اتدرج فى الترقيات لغاية لما اتولى منصب مساعد اول وزير الداخلية ومدير امن القاهره فى الفترة من سنة 1976 لغاية سنة 1978 . وفى يوم 30 مارس 1981 اتولى منصب مساعد اول وزير الداخلية ومدير جهاز مباحث امن الدولة

اكتشافه لرفعت الجمال

اللوا احمد رشدى ايام ماكان بيشتغل فى المباحث سنة 1954 اكتشف الجاسوس المصرى الشهير رفعت الجمال اللى اتعمل عنه مسلسل باسم رأفت الهجان بطولة الفنان الراحل محمود عبد العزيز ، وبعدما قابل رفعت الجمال اتصل على طول بعبد المحسن فائق ظابط المخابرات العامه المصريه اللى ظهر فى مسلسل رأفت الهجان باسم (محسن ممتاز) واللى كان لعب دوره الفنان يوسف شعبان .

توليه منصب وزير الداخلية

فى يوم 17 يوليه 1984 اتولى اللوا احمد رشدى منصب وزير الداخلية فى حكومة كمال حسن على رئيس وزرا مصر السابق ، واستمر فى منصبه فى حكومة الدكتور على لطفى اللى اتولى منصب رئيس وزرا مصر يوم 4 سبتمبر 1985 بعد اعتذار كمال حسن على عن الاستمرار فى منصبه بسبب ظروفه الصحية .
يعتبر احمد رشدى حاله فريده لوزير داخلية فيه شبه اجماع شعبى عليه ، وده بخلاف الصوره العامه اللى متاخده عن وزراء الداخليه ورؤساء المؤسسات الامنيه فى الدول الخاضعة لحكم الخونتا العسكريه .
احمد رشدى كان مهتم بقضية المخدرات فى مصر ، وكان بيرفض سياسة اعتقال المتطرفين لانه اعتبر ان المعتقل هو احسن مكان ممكن يتجمعوا فيه ويخططوا للعمليات الارهابيه.

اقالته من منصب وزير الداخلية

فى يوم 27 فبراير 1986 اقيل اللوا احمد رشدى من منصب وزير الداخلية بعد احداث الامن المركزى .

عضوية مجلس الشعب

تم انتخاب اللوا احمد رشدى لمنصب نايب فى مجلس الشعب عن دايرة مركز بركه السبع فى محافظة المنوفيه مرتين سنة 1987 وسنة 1990 .

وفاته

فى يوم 4 يوليه 2013 توفى اللوا احمد رشدى عن عمر يناهز 89 سنة .