غيابك يشغل عيون الزوايا وامتلى اشباح

عسى ما*ازعلتك البارح وزودت الجراح جراح
عسى مامرت الدمعة على اهدابك من اسبابي

جرحتك من كثر شوقي وخليت الكلام رماح
ولا ادري شلون يا عمري طعنتك حيل بعتابي

بدون شعور صدقني ترى كثر الغلا ذباح
تعال وشوف بغيابك غلاك شلون سوى بي

حرام تغيب من عمري وتعطيني الفراق وشاح
حرام الدمع في عيني مناديله هي اهدابي

غيابك يشغل عيون الزوايا وامتلى اشباح
وانا انثر صوتك بقلب المكان واشعل ابوابي

تلفت للامل دام الرجاء في عمري المنواح
انادي لك ولو شرهة وصولك تقطع اعصابي

ابيك الجاي من عمري انا ما ابيك شي وراح
مدامك اجمل واخر .. مدامك اول احبابي

ابي ارتاح يا عمري انا ادري هم تبي ترتاح
تعال وقبل ما افرح ترى تفرح بك ثيابي

احبك يا بعد عمر الحزن والجرح والافراح
احبك كثر ما نامت عيونك داخل اهدابي