صوتي رفعتـه بـس ماهـو بمسمـوع

الـيـوم انــا ابجـيـب للـكـل مـوضــوع
يهمَّـنـا يـانـاس فـــي كـــل الاوقـــات

صوتي رفعتـه بـس ماهـو بمسمـوع
وياكثـر منهـو غيرنـا يرفـع اصـوات

وموضوعنا جاكم على الكـمِّ والنـوع
احـاول اركِّـز علـى الـوضـع بـالـذات

القـار مـن نـوع الجرانيـف مصـنـوع
وحطُّوه بالمصنع على النار ساعـات

ومن الحـراره صـار بالحـال مميـوع
وصبُّوه بالشارع علـى شكـل دفعـات

وزانت شوارعنا مع النور مسطـوع
اكثـر شوارعنـا بـهـا انــوار غــازات

لكـن يجيـك اللـي بـدا فـيـه مـشـروع
وركـن علـى الطـريـق كــل المـعـدات

وقبـل البدايـه كـامـل الـدفـع مـدفـوع
مايعـتـرف بالبـنـك وتوقـيـع شيـكـات

وعلى الشوارع حط لوحـات ممنـوع
نآسـف علـى الإزعـاج تمـديـد لـيَّـات

حتى مشـروع الـرَّي احيـان مقطـوع
وقمنـا نعبِّـي مــن جمـيـع المحـطَّـات

ورفـع معـداتـه عـلـى دور الأسـبـوع
واسبوع ثاني ننتظـر رصـف صبَّـات

وقلنـا انتهينـا مـن تمـاديـد وارقــوع
كــود الـشـوارع تـزدهـر بالـمـمـرَّات

وجانا المرور وحط نـزلات واطلـوع
ونصب على الطريق بعض المطبَّات

قال السبب بعض السواقين مصدوع
قلنـا صحيـح النـاس فيهـم عـواجـات

وانتـم دوى للـي مـن النـاس ملكـوع
لـكــن حـنــا يـامــا شكـيـنـا مـعـانـات

كــم مــرَّةٍ الجـيـب بـالـجـو مـشـلـوع
وتـقـطَّـمـت الأذرعــــه والـمـقـصَّـات

مطـبَّـكـم مـافـيــه تـنـبـيـه مـشـمــوع
كــم اشتكيـنـا وقلـتـم لـنــا سـلامــات

وتم الموضوع اللي به العلم مجموع
العلـم جاكـم وانتـهـاء نـظـم الأبـيـات