تامر حسني يقدم لبسمة بوسيل هدية لا تخطر على البال

كشف الفنان تامر حسني عن هدية "غير مسبوقة" قدمها لأم أولاده الفنانة المغربية بسمة بوسيل بمناسبة يوم الأم، مؤكدا أنه يملك توثيقا مصورا لمعاناتها كأم منذ الحمل وحتى اللحظة، في رعاية أولادها، وقال إنه أصر على مشاركة أولاده الثلاثة مشاهدة هذه المقاطع ليعلموا حجم ما تحملته بسمة من مشقة، ووجه تامر رسالة مباشر لزوجته السابقة قائلا: لما يكبروا ان شاء الله هما يعملوا كده مع ولادهم وكمان يراعوا ربنا فينا لما احنا نكبر اوي.

تامر يملك تسجيلا مصورا لمعاناة بسمة بوسيل مع أطفالها
تامر كشف عن الهدية في سياق رسالة طويلة نشرها عبر كل منصاته على مواقع التواصل الاجتماعي للاحتفال بيوم الأم، قال فيها: جمعة مباركه يا أغلى الناس، النهارده بكتب لكم بوست عن الأم ونفسي من جوه قلبي تقروه من اخ لأخواته وناتج من تجربه حقيقيه بيني وبين أمي هحاول اختصره لأن الكلام عن الام يحتاج كُتب كتير.

تامر حسني: الأم بتشوف وبتحس اللي انت متعرفش تحسه
وواصل قائلا: هبدأ كلامي بإن اكتر موقفين في عمري زعلت فيهم هما اللي كنت معاندها في الرأي و كل الناس كانت في كفه و هي لوحدها في كفه، اقسم بالله الأم بتشوف و بتحس اللي انت متعرفش تحسه، اوعى تقول انا خلاص كبرت و مش هاخد رأيها والله والله بيبقى عندك دليل وحد بيطمنك او بينبهك من مستقبل الموقف و انت مش عايز تسمع و فاكر ان هي مش مواكبه الدنيا فهيكون رأيها رجعي تفتكر ربنا هيخلق قلب ام له فترة صلاحيه يعني بيحس لفتره محدوده !!!؟ اكيد لا مركز احساسها ممدود لآخر العمر في حاجه جواها بتقولها يا اه يا لأ صدقوها.

أضاف تامر حسني: افتكر مره زمان أمى فضلت تقولي على واحد صاحبي انه مش كويس وغدار وحقود انا فضلت اقولها حرام عليكي دا احسن واحد في صحابي و ادافع عنه باستماته لحد ما الايام دارت و فعلاً خرج منه الجرح الكبير و الحقد الكبير اللي ميطلعش من انسان بيكرهني اصلاً و عرفت ساعتها ان في ناس حوالينا لابسين قناع الحب لحد ما المصلحه هتروح و بعدين يبان وشهم الحقيقي فعلمت نفسي متعشمش اوي في الناس عشان لما يغدروا متعبش اوي و الناس الطيبين بجد اكيد هيبانوا و يبهرونا بحبهم و ثباتهم الطويل اللي مش مشروط ولا قائم على مصلحه يعني برضو مش هنظلم حد كويس بس هنلغي فكرة التسرع في العشم الزائد.

تابع قائلا: هاجي بقى لنقطه نفسيه غريبه انا كل ما تكون ايد امي على راسي والله والله والله بحس لو تعبان اني مرتاح لو مهموم اني مبسوط وكأنها بتشفط و بتسحب اي طاقه سلبيه مش كويسه و تحط لي طاقه جميله كلها خير و راحه، الايام اللي غصب عني مش بعرف اشوفها فيها بكون متوتر قلقان ولما بشوفها بقول في سري انا بحمد ربنا عشان اتولدت لقيت الست دي امي.

وأضاف تامر حسني: يلا نوريهم قد ايه بنحبهم و اللي مزعل اهله يروح فوراً يصالحهم يلا عندك سبب جميل اهوه جه من عند ربنا متخافش روح صالح ربنا هيكون معاك و هيخليك مجبور الخاطر صدقني .....و اكيد اتمنى لو يفضل ده شكل علاقتنا بيهم طول الحياه مش بس في عيد الام،، كل سنه و انتي طيبه يا امي ....

رسالة خاصة إلى بسمة بوسيل
ووجه تامر حسني رسالة خاصة إلى بسمة بوسيل قال فيها: كل سنه وانتي طيبه يا بسمه وكل سنه ووالدتك الجميله طيبه ... انا كل يوم يا بسمه بحكي لولادنا عن الاصول دي ومصورلهم كل تعبك معاهم من وانتي لسه حامل.

وتابع تامر حسني: هعدي عصبيتك عليا في الوقت ده مش مشكلة حقك، المهم مصورلهم مجهودك لحظة بلحظة عشان يعرفوا أنتي وأنا تعبنا عشانهم إزاي، ولما يكبروا إن شاء الله هما يعملوا كده مع ولادهم وكمان يراعوا ربنا فينا لما إحنا نكبر.

واختتم حديثه: إن شاء الله هتشوفي فيهم كل الخير عشان أنتي أم جميلة ومخلصة ليهم قدام ربنا.. كل سنة وكل أم في الدنيا طيبة، ويلا ندعي لكل أم مش معانا ربنا يرحمها ويرفع من قدرها في الجنة.

تعليق بسمة بوسيل على رسالة تامر حسني
بسمة بوسيل وجهت الشكر لتامر حسني، ودعت الله أن يحفظ أولادهم وتوقعت أن تكون ابنتيها أمايا وتاليا من أفضل الأمهات.