غرام الغيد ..

يقول اللي عشق وامْسَى جريح ٍ من غرام الغيد ..
.. صحيح الحبّ له سطوه على قلوب المحبيني

حبيبي صابني حبّه وصاب القلب بالتحديد ..
.. ومن زود الغلا والودّ لجله كم بكت عيني

هويته والهوى بلوى ولا اقوى البعد والتنكيد ..
.. ونار الحبّ في بعده على الجنبين تكويني

أحبّه حبّ من قلبي ولاني من هَل الترديد ..
.. سكن حبّه بقلبي والغلا والشوق طاويني

ألا ياويل قلب ٍ فيه حبّه والغرام يْزيد ..
.. نسيت الكلّ من شانه وضاعت ماضي سْنيني

أنا ودّي بشوفه كود يحصَل باللقا تجديد ..
.. يغيّب همّي الطاغي وبهْروجه يسلّيني

حبيبي كلّ ماشفته أحسّ انّ الضمير يْقيد ..
..لهيب الوجد يحرقني ولا لي من يواسيني

ولا قد غاب عن بالي وهو يضحك نهار العيد ..
.. سحرني بالعيون اللي على حتفي تودّيني

أنا ماظنتي بشوف مثله بالمدن والبيد ..
.. إلى منّه تهيّا لي عن الخفرات يكفيني