عندنا فى البيت ترابيزه

عندنا في البيت ترابيزة أنترية أصيلة خشب متين
و خدمة شاقة محطوط عليها رخامة من نوع جيد
ثقتنا إنها أصيلة كان مخلينا بنمرمطها ليل و نهار
أكل و مذاكرة و حتى اوقات يخرطوا عليها ملوخية
ووضع صينية سخنة مايضرش
نقف عليها نركب لمبة و نصلح فيشة وماله
و أخرتها ليفة و صابونة و نكحتها ترجع ألماظ
كبروا الولاد شوية و إتخانقوا مرة وقعوا الرخامة
و عشان هي بنت أصول
إتشرخت نصين بالطول من غير فتافيت
و لا جرحت حد ولا قطعت سجادة
بس خلاص كده مش هتنفع
و خلاص تقلت على إيدنا
و كان القرار نبدلها بلوح من الزجاج الرقيق الغالي
خفيف و أكثر أناقة
المعاملة إختلفت تمامااااا
مافيش سخن ولا ساقع
مافيش رجلين ولا مخرطة على وشها
خايفين منها و عليها
خايفين من شرخها و شظايا جرحها
أصلها بسكوتة ماتستحملش و لازم لها فوطة ناعمة
و ملمع غالي و معطر
فاكرين الرخامة؟؟
نصها تحت أنبوبة البوتاجاز عشان تشيل الصدأ
عن سيراميك المطبخ
و النص التاني اتصنفر و عملناه عتبة لباب الحمام
إنتي حره في حياتك
تعيشي يارخامة حمالة هموم
و خدمة شاقة و استرونج اخر تمام
ولا تعيشي بنورة رقيقة تتشال في رموش العين
و يخافوا من أي لحظة فرقعة
إنتي_وراحتك
بس للاسف كلنا هذه الرخامة