گال هواي تصفن گتله معذور عيونك عگل شيخ تريد حچاي

أجه بعد الغياب وگال محتام
وتسالمنه شبگ چن ماي والماي

تلاگينه برغم ما چانت وجوه
ملامحنه أنمحن من بچيه وبچاي

عاتبته خزر ما گالي شبيك
بچه ونزلت دمعته وگرب حذاي

گال أحچيلي فدوة شلونك اليوم
گتله شلوني وعندي أجوبه هواي

صفنت بعينه ساعة وغيرت لون
عينه .. غيار اليكدون حفاي

گال هواي تصفن گتله معذور
عيونك عگل شيخ تريد حچاي

گال بغيبتي لاگوك شمات
گتله وداعتك صدگاني وأعداي

گال أنه الك ... لا گتله غلطان
انه والخلفوني نحبك هواي

گال أرخصني أشمك گتله مرخوص
گرب شماني شم هدوم مشاي

گتله الشمس تچوي .. گال أجه الليل
الشمس ما تدنه يم رموشك فياي

أول ما گعدنه تراب والنوب
مسحت دموعه والگه الطين جواي

و وگفنه وگال أروح وأرد اوصيك
شد حيلك وكتنه سموم و عياي

أريدك من اروح تنام مرتاح
شنام وجفن عيني موالف حياي

ما طابگ جفن من روحتك ذيچ
هسه تريد أنام بروحتك هاي