شوف دمعة الفرقا

إجرح وأنا بَبْكي على قلبي إجرح
مادام لي قلبٍ يسامَحْك في الحال

قلبٍ يسامح وانت تجرح ويَدْمح
أبكيه؟ولاّ أبكيك؟ ولاّ ابكي الحال؟

قلبٍ على ذكراك يمْسِي ويصْبَح
صَبرَه طويلٍ لكن مْعاندِك طال

قلب ٍ تركتك فيه تسرَح وتمرَح
مِحتاج..حكّمْ داخل القلب.. محتال!

لو تدري المحزون وشلون يفرح
وقَفْت له مِن دَهشتِك. وقفة إجْلال

يفرَح. فرَح. خاسر تجارة. بمربح
فرحة غريقن ساقه الموج للجال

وإلا فرح مترقب الموت إلى أصبح
وهو بظنّه تالي الليل رحّال

لاشاف وجهك باسمٍ وانت تجرح
أو شافك بجرحه مع الناس تختال

ودّك تشوف الذل.في صورته صحّ ؟
شف دمعة الفرقا..على خدّ رجّال

ولاّتشوف الذل في صوره أوضح ؟
شف بسمة المقتول. في وجه قتّال



..
للشاعر /منصور الخنفري