يا عيد منت بعيد

العيد قرب والبلا ماهتني فيه
لاصار عيني ماتشوف الحبايب

ياعيد منت بعيد لاصرت ماجيه
والحظ مبعدنا ولاحنا قرايب

اللي بقلبي من عنا الوقت كافيه
ياعيد تكفى لاتزيد الصوايب

اليوم طاري العيد جتنا حكاويه
كلٍ على شوفه يحث الركايب

يبي نهار العيد عجله حراويه
عسا يشوف اللي به القلب ذايب

وانا من جروحي ليا مر طاريه
ماكنه الا هم حزن ومصايب

وش الفرح من غير شوفه واحاكيه
ولا .. وش الاعياد والزين غايب

اخفي عن العذال حزني واباريه
وجروحي اللي من فراقه عطايب

ماودي اقول الفرح غاب داعيه
والقلب عن عيد المسلمين طايب

اجي واروح وهاجسي يم راعيه
واقول في قلبي ترى الحزن عايب

لابان في وجه المعايد مواريه
الناس بعيونه تشوف العجايب