الحزن فيني كثيرٍ

الزمن .. والحظ .. همه غاضني
يالله أني في رجا عونك تعين

الحزن في صوتك ازعج ساكني
لين صار الكون من حولي حزين

غصب عني حزن صوتك هاجني
لين خلّى عاصي المعنى يلين

وامتثل حرف القصيد وعادني
وانسكب شعرك على حزني حنين

شلت انا صوتك وحزنك شالني
اكتم الصرخه وينساب الأنين

شفت حزنك كيف حزنك شافني
كيف داهم خلوتي في لحظتين

طير انا مثلك زماني ضامني
جرحتني مثلك سيوف السنين

صابك اللي من زماني صابني
في معاليق الحشا جرحه دفين

كلّما ودعت هم زارني
من عذاب الوجد بياح الكنين

الفرح عقب الصداقه هابني
خافت البسمه على وجهي تبين

طير ياللي صوت حزنك صابني
الله اللي ينتصر للصابرين