بروي عيوني يوم طيفك جفاني ...

شفني بقايا حبر منثور بكتاب
في صفحه الأحزان كل(ن) قراني

سجلت لك موعد لقاء بين الأهداب
بروي عيوني يوم طيفك جفاني

شمس الهجر تشرق ونور الوصل غاب
وضيعت بالوجهه سهيل اليماني

نظرات عينك كنها الشمس تنساب
تصهر جليد الشعر داخل كياني

كن القصايد فيك قبله ومحراب
آجذب من الخفاق جذب السواني

القلب بيت وصارت اضلوعي اطناب
تربعي بالعرش وسط المحاني

تستوطن الأشواق بعيون الأغراب
وسافر بذاتي وآنا في مكاني

ترحل ويبقى طيف ذكراك مرتاب
وتضيق في سطح المدينه مباني

اغتيلت البسمه على راس مرقاب
وعلقت للفرحه مع الحزن عاني

بذرت حرفي من طواريك بكتاب
لين ازهرت كل القصايد عشاني

لكن شموخي ماتعثر بالأعجاب
باقي على خبرك ولو قلت آناني

باب الغلا مقفول لاتفتح الباب
آخاف تلقى ساكن القلب ثاني