البارحة والعين كن فيها رمد

البارحة والعين كن فيها رمد،***تبكي من الدنيا وكثر اهوالها.
سهران اجر الصوت ببيوتٍ جدد،*** افرّج الضيقة على موالها.
وانشد ولا به من يجاوب من نشد،*** حتى البلد ماجاوبونا رجالها.
ولاعاد في هذا البلد غير الولد، ***اللي الى شاف الثقيلة شالها.
يشيلها لو كان ماعنده جَهَد، ***يبغى يكرّم لحيته وسبالها.
الله يخلي ذا الولد لأهل البلد،*** اللي عليه يسندون ثقالها.
يقوم للازم ولو غيره قعد، ***لا شافها ضاقت شرب فنجالها.
يقوم لو دمّه بشريانه جمد،*** يطري عليه الخيل ياخيالها.
لولا الولد في ذا البلد ماشفت احد،*** يظحك وكان اهل البلد يرثالها.
دايم يقولون الولد هذا سند، ***وتسنّد القالة على عقّالها.
خذا من الدنيا تجاريب ورشد،*** واصبح يعرف دقاقها وجلالها.
لكن حظه كل مايظرب وتد، ***يلقا حصاة وقالها من قالها.
حظه طريح وكل ما وقّف شرد،*** ضاقت عليه ايامها وليالها.
ولاشفت عزمه من عنا الدنيا برد،*** كنه على البيدا يدّك جبالها.
لاقلت له دنياك مافيها رغد، ***قال العبادة ماخلقنا الا لها.
ولا قلت له ماشفت لك برق ورعد،*** يقول بأمر الله تشوف خيالها.
على وعد والعين ترقب للوعد، ***طال الوعد والعين ترقب فالها.
ولاقلت له راحت حياتك في جلد،*** الى متى وانته تسوق جمالها.
قال الصبر لو كان جفني ما رقد،*** نصبر ولابد الفرج يبرا لها.
من المهد حتى نتوارا باللحد،*** مقّدرة ارزاقنا واجالها.
قلت الصراحة راح عمرك في كبد،*** تعيش باحلامك وطول امالها.
قال الولي اللي له المسلم سجد،*** يحلها لامن بلش حلالها.
ثم قال خذ شوري وطعني واستفد، ***شف حال غيرك واقتنع من حالها.
مالك ومال الضيق ياوجه السعد، ***وخل الهموم اقفايها واقبالها.
ولا تخلي الياس لامالك يهد، ***عمّر معا طول الرجى منزالها.
{الشاعر عبدالله سعود الدغيثر}

-




يعطيك العافيه يارب , ع الموضوع
دمت ودام ابداعك ف سما عشق ..,

تسسسلم الايـآدي على روعه طرحك
الله يعطيك الف عافيه يـآرب
بانتظـآر جــديدك القــآدم
آحتـرآمي لك

كل الشكر والامتنان على مرورك الطيب
نورت الموضوع بوجودك
وزادت صفحتي نورا واشراقة بطلتك..

سلمت آناملك لروعة طرحهآ..
يعطِـــيكْ العَآفيَـــةْ..

سلمت يداك على الطرح الراقي
جزاك الله خيرا وبارك الله فيك
لك اعجابي وتقديري