منتدى رواية عشق - يا سرع الأيام غيرته وبدلته

أخذت قلبي من ضلوعي ووصيته

علمته إن ما لنا حيلة ورديته

المشكلة حلها ما هو بـ في إيدينا

ماعندنا غير يا عله ويا ليته

أنا ما قصرت راسلته وكلمته

والله لو أقدر أسوي شيء سويته

كذا النهايات ما ترحم ضحاياها

ليت الغرام أوله يشبه لتاليته

الحب مثل العمر يقصر ليا طول

يزيد عمر الرجل وتقل عافيته

يصحابه اللي على القمرى يسامركم

في مركب تلعب الأمواج ناحيته

ما جاب لي علم ما سولف لكم عني

ما شفتوا الحزن في وجهه وناصيته

لا يدري إني نشدت وجبت له طاري

لا يدري إني ذكرت اسمه وخصيته

حتى لو إنه نساني ما علي منه

أنا لو أنسى أخواني ما تناسيته

بس المحبة لا صارت من طرف واحد

مثل الشعر لا فقد وزنه وقافيته

في ليلةٍ حزنها يملئ دقائقها

غصبت نفسي على دربه ومريته

قلت أتحراه لين أشرح له ظروفي

لو أدري إن ذا كلامه ما تحريته

يا سرع الأيام غيرته وبدلته

من أول يطير بالفرحة ليا جيته

حسبي على الناس ما خلوه في حاله

تدخلوا فيه حتى غيروا نيته

وش يستفيدون لا منا تفارقنا

خلوا صديق الدموع يحقق أمنيته

تفريق الأحباب ذنب يكره ربي

يسألهم الله عن جرحٍ تلقيته

جيتك يتيمٍ من اللوعة نفض يده

أنت العوض في حنان أمه وأهل بيته

أهداك روحه على كفه وقدمها

غير الحزن والسهر قل لي وش أهديته

من كثر ما تجرح احساسي ما عاد أحزن

الظاهر إن الحزن هذا تعديته

من كثر ما راحوا أحبابي من إيديني

لا شفت واحد أبيه يروح حبيته