منتدى رواية عشق - نصائح صحيه للطفل حديث الولاده

🌺 نصائح صحية 🌺

✋ لسه في أم بتنيم ابنها الرضيع على بطنه و ما تعرفش إن ده بيزود خطر الإصابة بالموت المفاجئ للرضع ⁉️
✋ لسه في أم بتشَّرب ابنها بيبي درينك الأعشاب ..رغم إن وزارة الصحة حظرت استخدامه ⁉️
✋ لسه في أم بتعمل لولادها بيات شتوي من غير استحمام و لا خروج ..وماتعرفش إن قلة الاستحمام بتجيب جرب و قلة الخروج بتأثر على نفسية الطفل ⁉️
✋ لسه في أم بتعطي ابنها الرضيع مهدئات عشان ينام و مش عارفه إن ده ليه آثار سلبية على مخ الطفل ⁉️
✋ لسه في أم ما تعرفش إن الخنفرة و الزغطة ظواهر طبيعية في الشهور الأولى⁉️
✋ لسه في أم ما تعرفش إن الرضاعة الطبيعية رقم واحد في أول ٦ شهور من عمر الطفل ، من غير أعشاب و لا ينسون و لا أكل و لا ميه ⁉️
✋ لسه في أم ما تعرفش إن فيه جرعة تطعيم ڤيروس بي في أول ٢٤ ساعة من عمر الطفل ⁉️
✋ لسه في أم ما تعرفش إن ڤيتامين ك حقنة بعد الولادة للطفل بيحميه من النزف و ڤيتامين د ٤٠٠ وحدة "ڤي دروب ٤ نقط " من أول يوم لعمر سنة يحمي من لين العظام ⁉️
✋ لسه في أم ما تعرفش إن الصفرا مش عاوزة ڤيتامينات و لا لمبة نيون..عاوزة كشف و تحليل و متابعة أو حضانة ..⁉️
✋ لسه في أم بتعرض ابنها للتلفزيون فترات طويلة و ما تعرفش إن ده بيعمل سمات توحد و فرط حركة ⁉️
✋ لسه في أم بتربط سرة المولود بحزام و ما تعرفش إن ده هيخليها تلتهب و إنها هتروح لوحدها في الغالب من غير ربطها ⁉️
✋ لسه في أم بتضرب ابنها عشان بيبلل سريره و هو نايم و ما تعرفش إن الضرب بيزود الموضوع ⁉️
✋ لسه في أم بتكحل المولود و تغربله و ما تعرفش إن الرصاص في الكحل يضر الطفل و الغربلة تعمل نزيف في المخ ⁉️
✋ لس في أم قلقانه من قشرة الرأس للمواليد كل ما تشيلها بفرشاة و زيت زيتون ترجع و ما تعرفش إنها من سن ٦ شهور لسنة هتختفي تماماً ⁉️
✋ لسه في أم بتعيط جنب طفلها لما يعيط جامد و يقطع النفس و يفقد الوعي ثواني و ما تعرفش إن دي نوبات حميدة و انفعالها الزائد بيخلي الطفل يزود فى عياطه كل مرة ⁉️
✋ لسه في أم ما تعرفش تحمي طفلها ازاي من إنه يشرق في أكل أو ألعاب صغيرة بإنها تمنع المكسرات خصوصاً الفول السوداني و اللب و تشيل أي لعب صغيرة من قدامه و لو شرق تقلب الطفل على بطنه و تخبطه على ظهره خمس ضربات و ترجع تقلبه على ظهره و تضغط في نصف صدره خمس ضغطات ..⁉️
✋ لسه في أم بتقلق لما تشوف بروز في ثدي الوليد و بعض نقاط اللبن و تعصرهم و ما تعرفش إن دي ظاهرة حميدة من هرمونات الأم و التعصير ممكن يعمل خراج للطفل ⁉️
✋ لسه في أم ما تعرفش إن نوم الرضيع متقطع جداً و بيبدأ ينتظم عند ٦ شهور و بتقلق لو الطفل نايم و خملان و مش راضي يرضع ⁉️
✋ لس في أم ما تعرفش إن الكالسيوم مش ڤيتامين و لا يعطى روتين إلا مع تحليل دم يثبت نقص الكالسيوم و أخد الكالسيوم بدون داعي يترسب في الكلى ..⁉️
✋ لسه في أم ما تعرفش امتى تقلق على تطور طفلها ..شهر ما بيتخضش من الصوت العالي ،شهرين ما ضحكش، تسع شهور ما قعدش ، سنة و نصف ما مشيش ⁉️
✋ لسه في أم ما تعرفش إن وزن طفلها بيتضاعف ٣ مرات في عمر سنة و طوله بيزيد بنسبة ٥٠٪ و مع كل زيارة للوحدة الصحية أو الطبيب لازم تقيس وزن و طول ومحيط رأسه ..⁉️