منتدى رواية عشق - قلبي وماضيه وغرامه

قلبي وماضيه وغرامه

مادام مايعنيك قلبي وأهتمامه
ولاتفكر يوم تسأل عن علومه

لاعد تجاملني بنظرة وإبتسامة
وأترك فؤادي في شقاه وفي همومه

خلّي الجفاء يغرس بإحساسي حسامه
ويسفك دماء الفرحة ويلجمني وجومه

وأنسى وفاء قلبي وماضيه وغرامه
ولأن الوفاء مجّان لاتدفع رسومه

مادام قلبك في الهوى أعلن صيامه
أكيد باأفرض على الخفّاق صومه

رغم الترجّي في أمانيه وهيامه
ومشاعر الودّ المليئة بالنعومة

تكفيني الذكرى ولحظات إنسجامه
أيام مانهتمّ للعاذل ولومه

أيام وصلك أسفر الليل وظلامه
ولوحدنا نسهر على طلّة نجومه

أجمل ليالي العمر بالافراح تامة
قبل الفراق اللي كوت روحي وسومه

بُعدك غزى جسمي وأستوطن سقامه
فيني وصبري عنك خانتني عزومه

والعاشق اللي جاك يبحث عن سلامه
لعواطفه ومعاك كم وفت سلومه

خلّيت للأحزان في وجهه علامة
قابلته بتعذيبك وتبخس قسومه

تزهد بإسعاده وتكثر من خصامه
وتطعن حشاه وفيك من قسوة خصومه

وحجبت عنه الدفء وتعرّي عظامه
للبرد وصقيع المعاناة وسمومه

الشعر يجمع لك بقايا من حطامه
يامدمّر أفراحه وسارق منه نومه