منتدى رواية عشق - - قاعدة خليهم لا تمنعهم .

/

هذه قاعدة تخليك تسيطر على حياتك وتتحكم بوقتك وطاقتك بشكل عجيب
وما تشتت وما تضيع عمرك على اشياء مستحيل تتحكم فيها

بعطيك امثلة واشرح لك الفكرة
وكمل للنهاية حتى تفهم

الشخص اللي تحبه قرر ينفصل عنك ؟
خليه ، لا تمنعه

الناس اللي تحبهم وحريص عليهم يتجاهلونك وما يكلمونك بالاسابيع ؟
خليهم ، لا تمنعهم

زميلك المفضل بالدوام وده يترك العمل ويروح مكان ثاني ؟
خليه ، لا تمنعه

تحس ان شخص ما يحبك ؟
خليه ، لا تمنعه

شخص من اقاربك سوا عزيمة وما عزمك ؟
خليه ، لا تمنعه

شخص عنده وجهة نظر في الحياة ما تعجبك ومختلفة عنك ؟
خليه ، لا تمنعه

ناس يتكلمو عليك من ورا ظهرك ؟
خليهم ، لا تمنعهم

يتصرفو كأنه مالك وجود ولا اي دور في حياتهم ؟
خليهم ، لا تمنعهم

تحاول تشوفهم بشكل حلو بس هم يبون يظهرون لك حقيقتهم ويحطمون الصورة الخيالية اللي راسمها في بالك ؟
خليهم ، لا تمنعهم

تصرفاتهم وكلامهم واسلوبهم يقول عادي انهم يخسرونك ؟
خليهم يخسرونك ، لا تمنعهم

ايش يعني هالكلام ؟

يعني لا تاخذ الامور بشكل شخصي وافصل نفسك عن قرارات وتصرفات واختيارات الاخرين

مستحيل راح تقدر تجبر احد يتصرف او يفكر او يحس بالشكل اللي انت تبيه

ولا كان نوح عليه السلام غير ولده وخلاه يركب السفينة ( يابني اركب معنا )، ( قال سآوي الى جبل يعصمني من الماء )
خلاه ، ماقدر يمنعه

تدري ايش المشكلة ؟
المشكلة ان 90 ٪ من اسباب المشاكل والتعاسة والحزن بحياتك هي لأنك تاخذ بتصرفات الناس بشكل شخصي وودك ( تتحكم فيهم )
محد يقدر يتحكم بأحد ،،
وهالشي يستنزف طاقتك ويعطل حياتك ويخليها ( ملخبطة معقدة )

مع ان الموضوع بسيييط جدًا
خليهم ، لا تمنعهم

خل الناس يسوون اللي يبونه باختيارهم لان هالشي مهم وراح يخليهم ( يظهرون لك حقيقتهم وحقيقة مشاعرهم )
بعدين قرر اذا كنت تبيهم بحياتك او لا

اقتنع بهالفكرة
فيه اشخاص وجودهم في حياتك المفروض انه ( مؤقت )
عشان يساعدونك تعرف نفسك وتفهم الحياة ويزيد وعيك ونضجك وبعدين يطلعو من حياتك ويجو غيرهم

يعني خروج احد من حياتك ( طبيعي تمامًا )
لان هالشي معناه ان احد جديد غيره جاي قريب عشان يعطيك درس جديد او يساعدك بمرحلة جديدة من حياتك ، وهكذا

لا تتمسك بأحد ،، لا تستنزف طاقتك وتفكيرك ومشاعرك على الناس
ايش يسوون الناس وايش يحسون الناس وايش يقولون الناس !
لان كل هذا ( خارج عن سيطرتك ومستحيل تقدر تتحكم فيه )

بالاخير راح تتعب ع الفاضي وكل واحد من الناس راح يسوي اللي يبيه وماعليه منك
وراح تحس بالخذلان رغم انه في الحقيقة انت اللي خذلت نفسك يوم ضيعت وقتك وانت تفكر فيهم

خليهم لا تمنعهم
طبق هالقاعدة في حياتك وراح يصير عندك طاقة اكبر وتركيز اكثر وراح تلقى وقت طويل تشتغل على نفسك وتحقق اهدافك وتوصل لاحلامك

لانك خليتهم وكملت مشوارك

لا تخاف ماراح توقف الحياة وراح تكمل حياتك وراح يجي الوقت اللي تكتشف فيه ان اصلا طريقك كان غير عن طريقهم وانك ماكنت راح توصل لو ما خليتهم