منتدى رواية عشق - يقولون مالا يفعلون >حامد زيد

https://encrypted-tbn0.gstatic.com/i...ocp5yrkd-Xzo9A

مابقى إلا سود الأيام تحرمك الرقاد
كيف الأوهام تجرأ إتسريك مغبون
من متى تجزع من الدمع وتخاف البعاد؟
من متى تقفي بك ظنون وتجيبك ظنون؟
صرت تاخذ كذبتي صدق، ومزاحي وكاد
لو بقول إني بخونك تحسب إني بخون
ماتعرف إن كل شاعر يهيم بكل واد؟
وإنهم دايم يقولون مالا يفعلون؟
أبكَ أنا لاقلت أبنساك وأنكرت الوداد
والله إني مانسيتك ولاهم يحزنون
من جزع من صفعة الشمس يطمع بالبراد
ومن فقد وجهاته الخمس يلقى بك ركون
إعتبرها هفوة إنسان أو كبوة جواد
لو بتسمح فانت غالي ولو تجرح تمون
عد صداتك مروة وطعناتك ضماد
خلهن لاراحن طعون ولا ردن طعون
خنجرك يستاهل الطعن ومتوني شداد
ومنك يازين الخناجر ويا بخت المتون
ردلي حنية المزح باحساس الجماد
خلنا واحد يجي صلب والثاني حنون
موت فيني وأندفن فيك بثياب الحداد
وإن حييت أموت لرضاك وأحيا بك بهون
مره أرقد بالكفن وإنت ترقد بالمهاد
ومرة أرقد بالمهد وأنت ترقد بالكفون
أدري إن شجونك شجون وإعنادك عناد
والبلا إن عنادك عناد وشجونك شجون
ربك اللي سخرك لي تقود وما تقاد
والله الخالق ولله في خلقه شؤون
إزرع ضلوعي من رضاك وإبشر بالحصاد
لعنبو من جيت ترضيه وترد إمحزون
بس تسوالك بلد؟ قول تسوالك بلاد
إنت كل العالم بكون ولحالك بكون
مابعد محبتك حب ومرادك مراد
غير كونك سيد حشاي تدري من تكون؟
نعمتين إختصوا الخلق من جود الجواد
كافل الأرزاق من حيث مالا تعلمون
البنون ونعمة المال بعيون العباد
زينة الدنيا بلا شك في كل العيون
مثل زينة دنيتي بس عندي شي زاد
من عرفتك صاروا المال وأنتَ والبنون
أنتشي بك نشوة التيه لعناق الرشاد
وأفزع الك فزعة القرم لشهاب الزبون
وأحصنك تحصين الأرزاق عن درب الفساد
وأعشقك عشق المظاليم لفراق السجون
لو تزيد الشوق جمرة تحولني رماد !
لو يزيد العشق شعرة بوصل للجنون !
خل هقواتك كبيرة ونظراتك بعاد
كانك أنت بكبرك تهون من اللي ما يهون؟
أزعلك وأرهن حياتي تحت رحمة زناد
تهبى لا والله إلا أنت والموت تهبون
عاد إذا ما أرضاك هرجي ولا اللي قلت فاد
إننا لله وإنا إليه راجعون
وأنت باكر بتعرَّف على ناس جداد
والكلام يجيك من كل شكل وكل لون
لاتحسب إن كل كلمة بتسمعها وكاد
ولا تصدق هرج شاعر وتخدعك الظنون
دايم أعرف كل شاعر يهيم بكل واد
وإن هم دايم يقولون ما لا يفعلون !
حتى أنا اللي قلت أعشقك وما أطيق البعاد
يمكن أطلع ماعشقتك .. ولا هم يحزنون