تدرين وش في غيبتك مستفيـده ؟
 

تدرين وش في غيبتك مستفيـده ؟

انا وش اللي بغيبتـك مستفيـده ؟
صدري وصل من الهم حد الشباعه


الصبح يضحك لي بضحكه جديـده
وانا الى هالحين مانمـت ساعـه


اسهر واسامر كل نجمـه فريـده
وان نمت ؟ قالت ليه هذي القطاعه


ياغايبه والليـل لا قويـت ايـده ؟
يدي ضعيفـه ماتقـاوي صراعـه


الحـب دمٍ والمواصـل وريــده
والقلب هو اللـي يزيـد اندفاعـه


غبتي وسميتـك : قريبـه بعيـده
والعين تحسد خافقـي عالقناعـه


جاعت عيوني شوفتـك ياعنيـده
ماترحمين اللي بلتـه المجاعـه ؟


بينـي واحزانـي علاقـه وطيـده
مثل العلاقه بين عقـرب وساعـه


فراقـك الله يمحـقـه لا يعـيـده
لازاد زاد الجـرح معـه اتساعـه


نسياني اكذب من كـلام الجريـده
وكتماني اعتم من عتام الإشاعـه


وأشواقي اصدق من فعايل رفيـده
وأبلغ من طعون اليدين الشجاعـه


شوقٍ هبا في القلب وسم الحديـده
والقلب لولا الصدر ؟ تم انتزاعـه


ولاجـداي الا حـروف القصيـده
عسى تزودنـي شويـة مناعـه


لك الله اصبر عالريـاح الشديـده
يالمركب اللي ضاع منه شراعـه


عسى الفرج يقبل ويهنـاك عيـده
وتبات عين اللي شقا البُعد لاعـه


وأقول للنجمـات فرصـه سعيـده
والمعذره دامي نويـت القطاعـه


ياغايبـه والنخـل يبّـس جريـده
ولا يغـرك راسهـا وارتفـاعـه


به في غيابك فايده بـس وحيـده
يمكن إنها هي العـزا والشفاعـه


تدرين وش في غيبتك مستفيـده ؟
اني اصلي الفجر ويـا الجماعـه.

---

وجدت هنا موضوع وطرح شيق
ورائع اعجبني ورآق لي
شكراً جزيلاً لك .
وبالتوفيق الدائم

دام حرفك وإحساسك ودام توهجك
يجبرني قـلمك دوما أن احلق بعيد حيث الإبداع
اللا متناهي والجمال الخلاب والكلمة الراقية
لقلبك جنائن المسك والكادي

~ يسلمووو دياااتك لروعه طرحها
يعطيك الف عافيه ..

يسسلمو ع المرور